NAGA CITY- Pigpatanidan kan Philippine Rice Research Institute (PhilRice) an mga paraoma sa Bicol Region na mas pahiguton pa an saindang pag-monitor sa mga omahan orog na ta padagos na naeeksperyensiyahan an pag-uran na piglaloman rason sa paglangkaw kan peste asin iba pang helang hasta sa bulan kan Setyembre.
Susog sa report gikan sa Bureau of Plant Industry, an mga mayor na huma sa nasambitan ng peryodo iyo an brown planthopper, bacterial leaf blight, rice blast, rice stemborer, asin rodents.
An mga peste na ini an kadalasan nahihiling tuyong mapanganuron hasta sa mauranon an panahon.
Dugang pa digde, an balik-balik man na pagtatanom na kawsa kan pag-uran an rason sa orog na pagdakol kan mga peste na nakaka-apektar nin dakula sa mga pananom.
Katakod kaini, tanganing mamanehar an nasambitan ng problema, pig-eenkaminar an mga paraoma na mag-adaptar nin integrated pest management practices siring kan pagtanom nin mga pest-resistant varieties, sarabay na pagtatanom sa laog kan komunidad, pagmantinir kan weed-free paddies asin iba pa.
Mientrastanto, liwat na pigpagirumduman kan PhilRice an mga paraoma na magtinir na alerto sa mga bagyo o halabang pag-uran nin huli ta an mga nadanyaran na dahon asin tagkay nagreresulta sa pagigin bulnerable kan mga paroy sa helang.
Para man sa mga naka-enrolled na sa crop insurance, an tolos na pagre-report sa mga danyos an kaipuhan para sa asistensiya na marereseber.
Sa ngunyan, pig-enkaminar na sana kaini an mga paraoma na i-report an kakaibang nangyayari sa saindang mga omahan tanganing malikayan an mas orog na danyos.
