Makalihis an pirang beses na pag-isnab, nag-atendir na sa pagdangog kan House Tri Committee an pirang pig-imbitarang online vloggers katakod kan pigsasagibong House inquiry dapit sa pag-urulay kan fake news asin disinformation.
Kabali sa nag-atendir sinda dating PCO Secretary Trixie Cruz-Angeles, Elizabeth Joie Cruz, MJ Quiambao-Reyes, Krizette Laureta Chu, Dr. Richard Mata, Dr. Ethel Pineda Garcia, Mark Anthony Lopez asin Aeron Peña.
Marurumdoman, enot nang nagpatanid an TriComm na papatawan nin contempt asin ipakukulong an vloggers na dae pa man maatendir sa pagdangog.
Mientrastanti, an tri-committee kinababalihan kan House committee on public order and safety, committee public information asin committee on information and communication technology.
An imbestigasyon kan panel an kasunod kan privilege speech ni Surigao del Norte Rep. Robert Ace Barbers na nagpahayag nin pagkahandal sa paglakop kan fake news online.
