Nakumpleto na an ranking sa eastern conference kan NBA puon No.1 hasta No. 6, pirang aldaw antes dagusang magpuon an 2025 Playoffs.
Sulamenteng mga nanggana na sana sa Play-In Tournament an pighahalat sa nasambitan ng conference tanganing dagusan na magpadagos an playoffs.
Basado sa pigluwas na ranking kan NBA, kapot kan Cleveland Cavaliers an top spot, tangan an 64 na kapangganahan asin 17 na pagkadaog.
Nagsusunod sa koponan an defending champion na Boston Celtics na igwang 60 kapangganahan asin 21 pagkadaog.
Nasa ika-tolong pwesto an New York Knicks na pigsunodan kan Indiana Pacers, Milwaukee Bucks, asin pang-anom an Detroit Pistons.
Ini an enot na pagkakataon na nakalaog sa Playoffs an Pistons sa laog kan pirang taon.
Nakatalaan na man na maglaban-laban sa Play-In an Orlando Magic, Atlanta Hawks, Chicago Bulls, asin Miami Heat na nasa top 7 – 10.
Duwa sa sainda an mapadagos sa Playoff ain mapano sa top-8 postseason picture kan eastern conference.
Sa ibong na lado, sulamente an top-3 positions pa sana an nakukumpleto sa western conference kan NBA. Nangengenot digde an Oklahoma City Thunder na igwang 67 na kapangganahan asin 14 na pagkadaog mantang nagsusunod an Houston Rockets, kapot an 52-29 win-loss record.
Sa presente, dae pa maaraman kun anong koponan an mapano sa No. 4, No.5, No. 6, asin No. 7 sa western conference huli ta sarong game sana an nagsusuhay sa sainda, basado sa saindang win-loss record.
Sulamenteng sarong game na man sana an nawawalat sa regular season, na piglalaomang magigin deciding factor kun saen sa sainda an otomatikong malaog sa Playoffs mantang an iba an dagusan na mararata sa Play-In bracket.
