NAGA CITY- Pigreport kan Police Regional Office Bicol an pagbaba sa nakumpiskar na illegal na droga siringman sa mga naaarestrar na indibidwal sa saindang pigkundusir na weeklong operation.
Sigun ki PRO-5 Brig. Gen. Andre Dizon, an saindang mga personahe nakapag-arestrar nin nasa 17 indibidwal puon Mayo 12 hasta 18 hababa kumparar kan nakalihis na semana.
Kabali sa mga naarestrar iyo an pigkokonsederar na mga high-value targets (HVTs) asin 15 street-level individuals (SLIs).
Apwera digde, nakumpiskar man kan mga otoridad an nasa P1.54 million hababa kumparar sa P2.6 million na nasamsam kan nakalihis na Mayo 5 hasta 11.
Pigsaysay pa kan opisyal na an mga otoridad, narekober an nasa 227.66 grams kan shabu asin 3 grams kan marijuana.
Katakod kaini, an Camarines Sur an nakapagreport kan pinakahalangkaw na nakumpiskar na pigpapangalad na bulong na nagpapakol sa nasa P1.36 million; pigsunadan kan Albay na igwang P87,280; Naga City na igwang P7,936; Camarines Norte sa kantedad na PHP33,932; asin Sorsogon na igwang P3,400.
An Catanduanes asin Masbate man mayong nairehistro na drug confiscations sa nasambitan ng peryodo.
Pigtawan duon ni Dizon na an pagbaba kan mga naarestrar asin nasamsam na droga an huli sa paglalapigot asin dedikasyon kan mga kapulisan sa saindang mga trabaho.
Sa ngunyan, pigsierto na sana kan opisyal na magpapadagos an saindang mahigot na kampanya kontra sa ilegal na droga tanganing maproteheran man an komunidad sa peligrong dara kaini.
