Dapat magtao an Philippine National Police (PNP) nin access sa mga police report asin iba pang dokumentong may koneksyon sa drug war killings sa administrasyon ni dating Presidente Rodrigo Duterte, sinaysay kan National Police Commission (NAPOLCOM) kan nakalihis na Miyerkules, Agosto 27.
An pahayag na ini ni Atty, Rafael Vicente Calinisan, Vice Chairperson and Executive Officer kan NAPOLCOM, an kasimbagan sa hapot ni Akbayan party-list Representative Chel Diokno kun tano nagsasayuma an pulisya na makipagtabangan sa imbestigasyon kan Commission on Human Rights (CHR) sa labi sa 4,000 drug war deaths sa mga operasyon.
Tinukoy ni Diokno an pahayag ni CHR Chairperson Richard Palpa-Latoc, na kadaklan sa mga istasyon kan pulis an dae nagsisimbag sa mga subpoena kan CHR sa police reports sa drug war killings susog na man sa Executive Order No. 2 ni Duterte sa Freedom of Information, na sinasabing an imbestigasyon kan pulisya an confidential.
Nagkaigwa soboot nin pag ulay kaiba an dating pamayo kan PNP sa irarom ni General Nicolas Torre III. Kaiba man si Representative de Lima.
Asin man an direktiba sa presente an mag luwas nin access tangani imbestigaran an pag iriba huli ta ini na an pinaka importante sa gabos, susog pa ki Calinisan sa Philippine National Police briefing sa House Public Order and Safety panel.
Naglalaom pa an opisyal na an bagong talaga na Chief PNP asin bilog na National Police Commission na presenteng pig iimbestigaran an extrajudicial killings cases. An NAPOLCOM an ahensyang tatawan nin mandato sa pangangasiwa asin man pagkontrol sa PNP.
Nagpagirundom si Diokno sa NAPOLCOM asin PNP na an exception sa irarom kan EO ni Duterte sa FOI an dae na dapat gamiton tangani itago an mga police document na may konkesyon sa drug war killings na ginibo kan pulisya huli ta an EO an dae nagtatao nin ‘absolute exceptions.’ igwa pa nin kondisyon na an government agency pwede na mag sayuma na mag provide nin dokumento kun mag ulang sa enforcement proceedings.
Marurumdumang kan nakalihis na bulan nin Marso, inarestar si Duterte asin dinara sa International Criminal Court sa The Hague, Netherlands sa mga reklamong crimes against humanity, na may koneksyon sa drug war killings kan saiyang administrasyon.
