Ipinag-sugo kan Philippine National Police (PNP) an pagbura kan videos asin mga litratong may kinaaraman sa marahas na pangbabadil sa Ateneo de Zamboanga University junior high school campus kaining Martes, Agosto 18, na ikinagadan kan duwang estudyante kaiba kan shooter asin ikinalugad kan anom na iba pa.
Katakod kaini, sinugo ni PNP chief PGen. Jose Melencio Nartatez Jr. an Anti-Cybercrime Group na makipag-takod sa social media platforms para i-take down an mga video asin litrato katakod kan insidente.
Ipig esplikar kan PNP chief na nais kan mga awtoridad na mapugulan an lalo pang pagkalat kan mga sensitibong materyal sa paagi kan pag-repost asin pag-share kan mga ini partikularmente na sa mga menor de edad.
Sa sarong pahayag, sinabi kan heneral na saro ining “unfortunate incident” na dapat itrato nin may lubos na pagiingat, lalo na mga minor an sangkot sa naturang content. Nangapudan man an PNP chief sa publiko na magin compassionate sa nangyaring trahediya sa paagi kan pagpapahiling nin respeto asin pagiging responsableng netizens o socmed users.
Nag apela man an PNP chief na ipundo an pag-share o pag-repost sa mga video asin litrato, asin nagbabalang posibleng magresulta ini nin lalo pang pagkabahala sa mga biktima asin sa pamilya siring man sa publiko asin posibleng makaapektar sa nagpapadagos na imbestigasyon.
Mientrastanto, inatasan na an Philippine National Police – Anti-Cybercrime Group (PNP-ACG) asin iba pang concerned units na imonitor asin ireport an pagkalat kan sensitibong content online.
