Pigkondenar kan Philippine National Police (PNP) an inapod kaining “senseless and cowardly ambush” sa saindang mga tropa sa Shariff Aguak, Maguindanao del Sur kan banggi kan Marso 28, 2026, na ikinagadan kan limang (5) pulis asin irido an tolong iba pa.
Segun sa pahayag, sinalakay kan mga dae pa nabibistong armadong suspechado an mga miembros kan 2nd Provincial Mobile Force Company mantang pabalik na sa saindang detachment makalihis na magkondusir nin patrol asin police visibility operations.Tulos man na dinara sa mga haraning ospital an mga nalugadan na personahes asin presenteng pigbubulong.
Sinabi ni PNP chief Jose Melencio Nartatez Jr. na naglansar na nin intensified hot pursuit operations an ahensya kaibahan an Armed Forces of the Philippines ngani na mabisto asin madakop an mga indibidwal na responsable.
Pigsierto kan PNP na ginigibo ninda an gabos na kinakaipuhan na lakdang ngani na makamtan an hustisya para sa pamilya kan mga biktima. Nagpaabot man nin pakikidumamay an mga pulis sa mga pamilya kan mga nagadan, na ilinadawan bilang mga indibidwal na nagpahiling nin kusog nin boot asin dedikasyon sa saindang mga trabaho.
Padagos pa man giraray an operasyon sa lugar mantang pigpapakusog pa an seguridad sa Shariff Aguak asin mga kaharaning komunidad.
