Nagtatabang na an Philippine National Police (PNP) sa paghahanap ki dating presidential spokesperson Atty. Harry Roque tanganing maiserbe an arrest order kan House of Representatives.
Sigun ki Santa Rosa City Representative Dan Fernandez, co-chairman kan House Quad Committee, nakikipagtabangan na an Kamara sa National Capital Region Police Office (NCRPO) asin sa Criminal Investigation and Detection Group (CIDG) para sa pagtugis ki Roque.
Kan nakalihis na Biyernes, pigdumanan kan mga otoridad an law firm ni Roque sa Antel Corporation Centre sa Makati City tanganing iserbe an arrest warrant alagad dae pig-ako kan saiyang staff asin mayo man sa lugar si Roque.
Si Roque an na-cite in contempt kan Kamara makalihis na dae ini mag-atender sa nakalihis na pagdangog kan quad committee.
Nagmatagas man si Roque na dae isusumiter an mga dokumento na kinababalihan nin kopya kan saiyang mga Statements of Assets, Liabilities, and Net Worth (SALN), rekord kan Biancham Holdings, na pagsasadiri kan saiyang pamilya asin an mga patotoo kan pagpapabakal nin pagsasadiri sa Parañaque City na pigsasaysay na pinaggikanan kan biglaang paglobo kan saiyang yaman.
Pig-enkaminar man ni quad committee overall chairman asin Surigao del Norte Representative Robert Ace Barbers an publiko na magtabang sa paghahanap ki Roque na pigsasaysay na igwang kinaaraman sa iligal na Philippine Offshore Gaming Operators (POGO)
