(UPDATE) NAGA CITY- Nakikipagtabangan na ngonyan an kabuhan kan PNP Goa sa Philippine Army katakod kan paggadan suboot kan rebeldeng New People’s Army (NPA) sa sarong lalaki sa nasambitang banwaan.
Sa entrevista kan Bombo Radyo Naga ki PO2 Erickson Dela Vega hale sa PNP Goa, sinaysay kaini na nakikipagtabangan na sinda sa mga militar makalihis na makaresibe nin sarong mensahe na pig-aako kan mga rebelde an paggadan sa biktima na si Michael Amador, 21-anyos.
Apwera sa anggulo na an rebeldeng grupo an yaon sa likod kan panggagadan sa biktima, nagpapadagos pa nanggad an PNP sa saindang pigkokondusir na mararumang imbestigasyon.
Pigtuga man kan PNP na dae pa ninda maaraman kun ano an posibleng motibo sa likod kan nangyaring pambabadil.
Marurumduman na nadukayan na sana an bangkay ni Amador sa parte kan barangay Lamon na igwa nin tama kan bala sa saiyang payo asin lalawgon.
Sigon man sa nagpabistong miyembro kan NPA, tinawan suboot nin padusang kagadanan an biktima huli sa sahot na pang-eespiya sa saindang kilusan.
Mientrastanto, sigon ki Dela Vega, igwa sindang namomonitor na mga miyembro kan rebeldeng NPA sa nasambitang barangay kaya man mahigot an saindang pigkokondusir na operasyon sa lugar.
