NAGA CITY-Nanindugan an Philippine National Police na pigsunod ninda an legal security protocols kan isirbi an arrest warrant laban ki Kingdom of Jesus Christ leader Pastor Apollo Quiboloy asin 5 iba pa sa Davao City.
Sa sarong patara-tara pigsambit kan PNP na lehitimong operasyon an saindang pigsagibo na striktong alinsunod sa legal security protocols asin may magkakanigong paggalang sa gabos nin imbweltong partido.
Dugang pa kan pambansang pulisya pigbibisto ninda an high-profile nature kan subject kaya pigsisierto ninda an presensya kan bastanteng numero kan kapulisan sa kasagsagan kan operasyon tangani na mamantinir an kaayusan asin malikayan an anuman na dai pig-aasahang mga insidente.
Nakipagkoordinar man soboot sinda sa mga lokal na opisyal tangani na masierto an matuninong asin tultol na pagpapautob kan saindang operasyon.
Strikto man soboot nin nagsunod an PNP sa guidelines na piglatag sa PNP Operational Procedures Manual na nagtataong duon sa importansya kan paninindugan sa karapatang pantawo asin pagsasagibo nin police operations na may integridad.
Nag-apelar man an PNP ki Pastor Quiboloy na nagtetenir na dai pa nahahanap na magsuko asin hampangon an mga reklamo laban saiya.
