Inihayag kan Philippine National Police (PNP) na preparado ining pamayuhan an mga kilos-protesta sa Setyembre 21, kasabay kan paggirumdom sa ika-53 anibersaryo kan Martial Law.
Sigun ki PNP spokesperson Brig. Gen. Randulf Tuaño, matalaga nin 23,201 tauhan sa bilog na nasyon: 9,239 sa checkpoints, 5,917 sa crowd management, 4,530 komo support force, 415 para sa drone operations, asin 3,100 sa traffic control.
Pigkakarkulong dae malampas sa 10,000 an makikisumaro. Pigtawan-duon ni Tuaño na nasa heightened alert an pulisya alagad papairalon an maximum tolerance.
Dugang pa kaini, na kakaiba an sitwasyon sa Pilipinas kumparar sa Nepal asin Indonesia huli ta mismong si Presidente Ferdinand Marcos Jr. an nagpapuon kan imbestigasyon sa anomalya sa flood control projects.
Nakikipag-koordinar man an PNP sa LTO, LTFRB, asin MMDA para sa libreng lunad sa tahaw kan transport strike.
Labi sa 200 sektor asin grupong simbahan an naghayag kan intensyong mag atendir sa protesta.
