NAGA CITY- Pigtawan-duon kan Philippine National Railways (PNR) an pagbuhay kan serbisyo o ruta sa pag-ultanan kan Quezon asin Camarines Sur makalihis an pagpapakarhay kan tulay na nagkokonektar sa duwang probinsiya.
Sigun ki PNR general manager Geovanni Miranda nakumpleto na kan ahensiya an pagpakarhay sa Binahan Bridge sa Ragay, Camarines Sur na lakdang tanganing liwat na maibweltada an commuter trips sa pag-ultanan kan Bicol Region asin Southern Tagalog.
An Binahan Bridge an saro sa mga crucial structures na kaipuhan na pakarhayon tanganing maipagpadagos kan PNR an plano kaini na liwat maibalik an serbisyo sa mga commuters.
Marurumduman an tulay an nagsapo nin labing danyos huli sa Typhoon Kristine kan November 2024, asin inabot nin haros duwang bulan an PNR tanganing pakarhayon ini.
Katakod kaini, tanganing mapapapusog pa an tulay an traditional na wooden ties an niribayan nin synthetic alternatives.
Mientrastanto, an PNR an mapadagos sa pagpapakarhay kan mga tulay asin estruktura, obheto kaini na mapahewas pa an serbisyo kan train sa Ragay, Camarines Sur asin Tagkawayan, Quezon.
Marurumduman, an PNR an sulamenteng operational sa Bicol Region makalihis na ipauntok an serbisyo pa Metro Manila kan taong 2024 tanganing magtaong dalan sa nasa P873.6-billion North-South Commuter Railway.
