SA tahaw kan matinding pagkakabaranga kan pulitika sa Estados Unidos, pinili ni Pope Leo XIV — an primerong Amerikanong Santo Papa an maingat asin bakong makatuwirang pagtuyaw mantang pigmamantinir na bukas an komunikasyon.
Puon ka maelihir ini kan nakalihis na Mayo, hayagan nang tinutulan ni Leo XIV an nagkapirang desisyon kan administrasyon ni US President Donald Trump.
Kinondenar kaini an “inhuman” na pagtrato sa mga migramte, nangapodan nin diyalogo sa Venezuela, asin nagpahayag nin pagkahadit sa sarong “diplomacy of force”. Siringman, sa mga nakalihis na semana nagin mas maingat an Santo Papa.
Dae ini nagkomento sa posibleng interbensiyon kan US sa Iran, sa plano ni Trump dapit sa Greenland, o sa tensiyon sa Minneapolis makalihis mabadil an duwang protesters kan federal agents.
Likay man an saiyang semanahang pahayag sa mga isyung ini asin bihira na man an saiyang pakikipag-ulay sa media.
Kan nakalihis na semana sana ini nagtaram tanganing ipahayag an “great concern” sa nagtitinding tensiyon sa tahaw kan Cuba asin Estados Unidos asin nangapodan sa habos na “avoid violence”.
Dugang pa, aram kan Santo Papa na apektado na man an Simbahang Amerikano, orog na an mga migranteng pigtatabangan kaini, sa tahaw kan paghihigpt kan Immigration and Customs Enforcement (ICE).
Imbes na direktang maki-imbwelto, mas pinili ni Pope Leo na ipaubaya sa mga obispo kan Estados an pagsimbag sa mga isyu.
