Pig-omaw ni Speaker Martin Romualdez, an pagkakahalal ki Pope Leo XIV komo bagong Santo Papa. Soboot, nagpapahiling ini sa padagos na misyon kan Simbahang Katolika na ipakuriyat an ebanghelyo, magsirbi sa mga nangangaipuhan, asin man magin liwanag sa tahaw kan kadikluman.
Pigbisto ni Romualdez an halabang eksperyensya sa pagigin misyonaryo asin pastoral leadership ni Pope Leo XIV, na dati’y Cardinal Robert Francis Prevost sa saiyang pagsisirbi sa Latin America.
Binanggit man ni Speaker Romualdez, na an pastoral na estilo ni Pope Leo XIV an nagpapahiling kan pamana ni Pope Francis, na pinapadangat kan mga Pilipino komo si “Lolo Kiko.”
Nagtutubod si Romualdez, na an pagkakahalal ki Pope Leo XIV an nagpapatibay sa misyon kan simbahan na manindugan para sa mga pobre, mga nawaran nin maiistaran, asin man sa mga mayong boses—sarong pangapudan na pumupukaw sa puso kan mga Pilipino, orog na ta an Pilipinas an ikatulong pinakamadakulang nasyon na Katoliko sa bilog na kinaban, sigun pa ki Speaker Romualdez.
Ipinahayag man kan lider kan Kamara an saiyang pag-laom na makabisita sa Pilipinas si Pope Leo XIV sa panahon kan saiyang pamamayo.
Pig-inkaminar man kaini an gabos nin Pilipino, ano man an relihiyon, na magkasararo sa pamibi para sa bagong Santo Papa.
