Nagpahayag ng suporta si Pope Leo XIV sa pansamantalang kasunduan sa pagitan ng United States at Iran na layong wakasan ang umiiral na tensyon at sigalot sa Gitnang Silangan.
Sa isang panayam sa Castel Gandolfo, sinabi ng Santo Papa na nagpapasalamat siya sa Diyos dahil nagkaroon ng pagkakasundo ang dalawang bansa at inaasahang pormal itong pagtitibayin sa Biyernes.
Ayon kay Pope Leo, mas mainam na maresolba ang mga hindi pagkakaunawaan sa pamamagitan ng diyalogo at negosasyon kaysa sa paggamit ng dahas at muling paglala ng armadong tunggalian.
Binigyang-diin din niya ang kahalagahan ng diplomasya bilang pangunahing daan upang makamit ang pangmatagalang kapayapaan at katatagan sa rehiyon.
Umaasa ang Santo Papa na magsisilbing mahalagang hakbang ang naturang kasunduan upang mabawasan ang tensyon sa Gitnang Silangan at maiwasan ang karagdagang pagkawala ng buhay at pagkasira ng mga komunidad na apektado ng kaguluhan.
Matatandaang naging kritikal si Pope Leo sa mga nagdaang tensyon sa pagitan ng Estados Unidos at Iran at paulit-ulit na nanawagan para sa mapayapang resolusyon ng mga sigalot. Dahil dito, nakatanggap din siya ng batikos mula kay Donald Trump.
Sa kabila nito, nananatiling sentro ng mensahe ng Santo Papa ang pagsusulong ng kapayapaan, pagkakaisa, at bukas na pag-uusap bilang pinakamabisang paraan upang maiwasan ang karahasan at maprotektahan ang buhay ng mga sibilyan.
