NAGA CITY- Pigtawan duon kan Philippine Red Cross Camarines Sur Chapter an importansiya kan pakikisumaro sa International Volunteers Day.
Sa entrevista kan Bombo Radyo Naga ki Maria Felisa Badiola, Chapter Administrator kan Philippine Red Cross Camarines Sur Chapter, sinaysay kaini na parte kan mantra kan saindang organisasyon an volunteers.
Sigun ki Badiola, dae kayang i-mantinir kan saindang lado an serbisyo asin mga programa kun mayo an tabang asin presensiya kan mga volunteers.
Huli kaini, kaipuhan na makisumaro sinda sa pagselebrar kan International Volunteers Day orog na ta an Red Cross sarong International humanitarian organization.
Boot sabihon sa aldaw man na ini nakikisumaro an saindang lado sa pagtaong onra sa mga volunteers na preparadong magtao kan saindang oras para sa pangangaipuhan kan komunidad. Kaipuhan na sa panahon na ini nabubuhay an boluntarismo tanganing kadakol pa an matawan nin serbisyo.
Sa ngunyan, pig-enkamianr na sana ni Badiola an publiko na magpasiring sa saindang opisina an mga mawot na magin volunteer kan saindang organisasyon.
