NAGA CITY- Pigkumpirmar na kan Bureau of Animal Industry (BAI) an premirong kaso kan “Q Fever” sa nasyon.
An nasambitan ng helang, na pangenot na nakakaapektar sa mga baka, tupa asin kambing, an pupwedeng mailipat sa tawo sa paagi kan paglanghap kan kontaminadong alikabok.
Sigun ki Dr. Christian Daquigan, officer-in-charge kan National Veterinary Quarantine Services Division kan Bureau of Animal Industry, an kadaklan sa mga kambing na nagpositibo sa helang an nasa Santa Cruz, Marinduque.
An Q fever an sarong disease na kawsa kan bacterial pathogen Coxiella burnetii, sigun sa National Institutes of Health (NIH).
Pira sa mga sintomas kaini sa tawo an panginig, kalintura, muscle pain, asin enkaso dae naagapan an posibleng magpasiring sa komplikasyon sa atay o puso.
Sa ngunyan mayo pa nin pigkumpirmar na kaso kan Q-fever sa tao.
Mahigot na pigtututukan ngunyan kan Bureau of Animal Industry an mga lakdang tanganing mapugolan an pagkurit kan nasambitan ng helang. Na-depopulate na man an nasa 5 dosenang infected na kambing gikan sa United States asin nagpapadagos an tracing sa mga potentially infected animals.
Apwera pa digdi, nakikipagtabangan na an Bureau of Animal Industry sa Local Government Unit (LGU) para sa dugang na aksyon sa laog kan Marinduque tanganing masierto an sakto asin timely testing sa mga pinagtutubodan pa na kaso.
Mientrastanto, makalihis na maresiber an resulta kan PCR test, tolo na ipinag-sugo ni Agriculture Secretary Francisco P. Tiu Laurel, Jr. an tolos na tracing sa mga potensyal na nahawaang hayop asin paramientrasta na pagbabawal sa pag-aangkat nin mga kambing gikan sa U.S.
Ipinagsugo man kaini an preventive suspension kan pirang mga personahes kan Bureau of Animal Industry mantang nakabinbin an pagsisiyasat, pagrepaso sa Bureau of Animal Industry’s quarantine asin disease control protocol, asin potensyal na blacklisting kan importer nin mga infected na kambing.
Pigsierto kan Department of Agriculture sa residente kan Sta. Cruz, Marinduque kan gabos nin kinakaipohan na tabang tanganing mapugolan asin mawakasan an helang asin maitao kan ahensya.
