NAGA CITY- Padagos an pigsasagibong preparasyon kan mga otoridad katakod kan nagdadangadang na selebrasyon kan Peñafrancia Festival ngunyan na taon.
Sa nagin paghampang sa mga kagawad kan media ni PLt.Col Salvador Ortañez, Deputy City Director for Operation kan Naga City Police Office, sinaysay kaini na nakipag meeting na sinda sa simbahan asin LGU tanganing iheras an saindang mga preparasyon pag-abot sa seguridad para sa nasambitan ng aktibidad. Kun sain, kan nakalihis na Biernes nagpaabot na sinda nin meeting kaibahan an iba pang intel personnel tanganing magbilog nin mga lakdang tanganing malikayan an paglakop kan manlaen-laeng kriminalidad siring kan theft.
Piglalaoman kaya kan mga otoridad na liwat na madakol an mga mahabon sa syudad katakod kan nagdadangadang na dakulang selebrasyon na ini. Nakipagkoordinar naman soboot sinda sa mga malls tanganing tolos na maarestar an mga posibleng maggibo nin maraot sa laog kan mga nasambitan ng establishemento.
Dugang pa kan opisyal, igwa naman sinda nin pigrequest na nasa 1,500 na augmentation force na makakatuwang ninda sa pagbabantay sa enterong syudad nin Naga kasabay kan selebrasyon kan Kafiestahan ni Ina.
Liwat man na nagpagirumdom an opisyal sa mga kagsadiri kan mga boarding house na bistohon nin marhay an mga marenta sa saindang harong ta baad eyo na ini an mga mararaot an boot na nagdadayo sa syudad nin Naga toyong Peñafrancia.
