Pormal na piglansar kan Department of Education (DepEd) ngonian na aldaw, Agosto 26 an Project LIGTAS o Learning Institution Geohazard Tracking and Assessment for Safety makalihis an matrayumpong pilot testing kaini kan Mayo.
Ini sarong advanced risk intelligence platform na naggagamit nin Artificial Intellegence (AI) asin mga satelite image tanganing mamidbid an mga posibleng peligro sa lambang eskwelahan.
Kabali sa mga mayor na tampok kaini iyo an sarong AI-powered weather forecast na nagtatao nin impormasyon manungod sa mga kondisyon kan panahon sagkod sa sampulong aldaw antes pa an kalamidad.
Gamit man an mga satellite images at hazard maps,ini nagtutukdo nin mga partikular na peligro sa lambang eskwelahan asin nagtatao nin amay na patanid.
Kaiba sa mga peligrong pigtututukan kaini iyo an mga baha, aktibidad kan bulkan, pagrasay kan daga, asin mga linog.
An Project LIGTAS o Learning Institution Geohazard Tracking and Assessment for Safety may katuyuhan na matabangan an mga eskwelahan asin lokal na gobyerno na mag-andam asin magsimbag sa mga banta nin kalamidad nin mas amay, mabawasan an mga aldaw nin pagkanselar kan klase, asin papagdanayon na ligtas an mga paratukdo asin mga estudyante.
An platform dai direktang nag-oorden nin suspensyon kan klase, alagad ini nagtatao nin risk assessment na pwedeng magin basehan kan mga Local Government Units asin mga awtoridad kan eskwelahan sa saindang mga desisyon.
