Pigtawan-duon kan testigo kan prosekusyon, an dating COA state auditor na si Roderick Wamil, na kun an sarong Notice of Suspension naresibe huli sa dai pagsunod sa mga patakaran sa pag-audit, igwa nin presumption na an mga pondo ginamit para sa personal na ganansya, sa irarom kan mga patakaran na nagkokontrol kan paggastos kan mga Confidential Funds.
Ini an simbag kan testigo sa kahapotan ni Senator-Judge Imee Marcos kun igwa nin findings an COA na ginamit para sa personal na ganansya an confidential funds kan OVP.
An testigo orog pang nagpaliwanag na “mayroong presumption kayat hindi na kailangan pang sabihin”, base sa nakasurat sa Joint Circular 2015-01, na nagbubugtak nin mga giya sa paggamit asin pag-audit kan mga confidential asin intelligence funds.
An pigtutukoy ni Wamil iyo an Paragraph 8.3 ng joint circular na nagsasabi na an pagkabigo kan sarong opisyal na may paninimbagan na mag-liquidate kan pampubliko o Confidential Funds katumbas kan “prima facie evidence,” na an nawawarang mga pondo ginamit para sa personal na pakinabang.
Naghapot man si Marcos kun igwang COA finding sa Audit Observation Memorandum asin notice na nahabon an confidential funds?
Nagsimbag si Wamil na igwa nin prima facie na ebidensya na ini ginamit para sa personal na paggamit asin benepisyo sa irarom kan pinagsararong circular.
Marurumduman na pig-audit ni Wamil an confidential funds kan DepEd asin OVP kan 2022 asin 2023 kan ini nagsirbe sa Intelligence and Confidential Funds Audit Office (ICFAO) kan COA.
Ini na an ikatolo asin huring aldaw na nagtindog si Wamil sa witness stand mantang nagpapadagos an paglilitis sa mga reklamo nin Impeachment laban ki Bise Presidente Sara Duterte, partikularmente an mga alegasyon kan soboot salang paggamit kan Confidential Funds na itinagama para sa OVP asin sa Department of Education (DepEd).
