(UPDATE) NAGA CITY- Dae hinahale kan Philippine National Police an posibilidad na igwa pang ibang mga kasabwat an nadakop na aktibong pulis na nangutong asin nagpabisto pang miyembro kan rebeldeng New People’s Army (NPA) sa ciudad nin Naga.
Sa ekslusibong pakikipag-olay kan Bombo Radyo Naga ki PC/Insp. Paul Cabug, mula sa Camarines Sur Police Provincial Office (CSPPO), sinaysay kaini na nakalista sa cellphone kan suspek na si PO2 Gilbert San Juan Embuestro, alyas ‘Ka Dave’ an mga numero kan pigtutubudang mga kasabwat kaini sa pangingikil.
Pinurbaran suboot kan mg pulis na apudan an nasambitang mga numero alagad dae na ini maapodan sa ngonyan.
Sigon ki Cabug, posibleng ginagamit man ni Embuestro an pagiging sarong assistant intel officer sa Pamplona PNP sa saiyang iligal na aktibidad.
Mientrastanto, posibleng si Embuestro man suboot an nangungutong asin nananakot sa mga barangay kapitan hale sa nagkapirang mga barangay sa mga banwaan sa ikaapat na distrito nin Camarines Sur.
Ini huli naman sa kadakol na mga contacts kan mga barangay kapitan na nakalista sa cellphone kan nasambitang pulis.
Marurumduman na nadakop an suspek na si Embuestro sa entrapment operation sa ciudad nin Naga makalihis na mangutong sa sarong construction company asin nagpabistado pang miyembro kan rebeldeng NPA.
