Orog na pinahigot pa kan Philippine National Police (PNP) an seguridad sa bilog na Metro Manila komo kasimbagan sa pangapudan ni Presidente Ferdinand “Bongbong” Marcos para sa mas pakarhay, matrangkilo, asin man salbado na kapalibutan.
Ngunyan na aldaw nin Lunes, inilunsar kan National Capital Region Police Office (NCRPO) an mahewasang deployment plan kun saen nag aabot sa 21,213 pulis gikan sa kabilogang 23,305 pwersa kan NCRPO an ipinakuriyat sa manlaen-laeng panig kan Metro Manila.
Obheto kan lakdang na ini na pakusugon an presensya kan kapulisan tangani mapugulan an krimen asin man masiguro an kaayusan.
Sa bagong setup igwang 13,473 an nasa beat patrols, 293 an bantay sa MRT, LRT asin man mga terminal, 2,944 sa mobile patrols gamit an motorsiklo, kotse, asin bisikleta, 629 sa mga checkpoints, 344 sa border control, 1,794 sa mga fixed outpost mantang 2,192 an admin patrol duties.
An deployment ay nababanga sa mga distrito siring man kan Manila Police District (4,049 personnel), Southern Police District (4,924), Quezon City Police District (4,308), Northern Police District (3,293), Eastern Police District (3,136), Regional Mobile Force Battalion (819), asin Regional Headquarters (684).
Sigun ki PNP Chief PGen. Rommel Francisco Marbil, an nasambitan ng recalibrated deployment plan an simbag sa pangapudan kan Presidente tangani maghatod nin seguridad asin man serbisyo sa publiko.
