Pigsaysay kan Department of Foreign Affairs na posibleng abuton nin sarong semana o labi pa an planong repatriation sa sarong turistang Pinoy na binawian nin buhay makalihis na mabudalan kan taxi sa Tsuen Wan West sa Hong Kong kan nakalihis na Martes.
Katakod kaini, nag-abot na sa Hong Kong an pamilya kan biktima kan nakalihis na Huwebes kun saen sinda an pigsabat kan Consul General kan Pilipinas sa airport.
Sigun ki Ambassador Angelica Caraos Escalona, tagapagtaram kan Department of Foreign Affairs, paluwas na kan hotel an biktima dara an saiyang bagahe kan mabudalan ini kan taxi asin maipit sa sarong kolum.
Nakamate soboot nin pagkalula an 80-anyos na driver kan taxi asin nawaran nin kontrol sa pigmamanehong lunadan.
Mientrastanto, mantang nasa kustodiya kan Hong Kong police force an driver nagpapadagos pa man an imbestigasyon.
Pighahalat pa soboot an full forensic report asin depende sa magigin resulta kaini maaraman enkaso igwang paninimbagan an driver sa insidente.
Sa ngunyan, padagos an Department of Foreign Affairs sa pagtabang sa pamilya kan nasambitan ng biktima.
