Arestado an sarong retired pulis kabali an tolo (3) pang indibidwal sa matrayumpong buybust operation kan mga otoridad sa syudad nin Naga na pinangenotan kan PDEA Camarines Sur katuwang an an iba pang ahensya kan gobyerno asin kan pulisya.
Sigon ki IA V Adrian Fajardo, Provincial Director kan PDEA Camarines Sur, kumpiskado an poco mas o menus 65.06 grams nin pinagtutubudadn na shabu asin nagkakantidad nin P488, 240.00.
Dagdag pa kan opisyal, sa paagi kan pakikipagkooperar asin sa sumbong kan mga residentes, tulos na nagkundusir nin berepiskasyon an mga otoridad asin nagsagibo nin serye nin imbestigasyon tanganing kumpirmaron an nasabing mga sumbong.
Matrayumpong naarestar an target na si alyas Vitoy- retired Police Officer SPO1, residente kan Deca Homes Northfield Subdivision, Brgy. Bagumbayan Norte Naga City ; kabali pa sa mga naarestar sina Alyas Albert, 40 anyos, may agom, driver mechanic, residente kan Sto. Domingo Calabanga Camsur; Alyas Danilo, 42 anyos , mayong agom, construction worker, residente kan Bagumbayan Norte, Naga City asin si Alyas Jeffrey 33 anyos , mayong agom pedicab driver asin residente man kan nasambit na Barangay.
Sigon pa sa opisyal, kinukonsiderar na High Valued Individual si alyas Vitoy.
Mientrastanto, sigon pa ki Fajardo, an PDEA mayong pinipili, an pagkakaarestar sa retiradong pulis sarong mensahe sa publiko na an siisay man na mapatunayan asin igwa nin supisyenteng ebidensya , dai maduwa-duwa an mga otoridad na gibuhon an saindang obligasyon na dakupon an siisay man na nagbalgar sa ley.
Sa ngunian, nasa kustudiya na kan mga otoridad an mga suspetsado para sa magkakanigong disposisyon.
