Arestado an tolong lalaki sa matrayumpong buybust operation kan mga otoridad sa Brgy. KM9 Pacol Naga City kasuudma Huebes Marso 26, 2026.
Binisto an mga suspek na si Alyas ‘Ric’ 44 anyos, welder asin residente kan nasabing lugar; Alyas ‘Jun’ 32 anyos, driver asin residente man kan Zone 6, Pacol Naga City asin si Alyas ‘Joe’ 29 anyos, single, mayong trabaho asin residente kan Dimasalang St. Sta. Cruz Naga City.
Nakabakal an pusher buyer nin sarong pidasong heat sealed transparent sachet kan pinagtutubudan na shabu ki Alyas ‘Ric’ asin sa pagrekisa kan mga otoridad, kumpiskado an 13 pidaso kan pinagtutubudan na shabu sa suspek kaayon an buybust money mantang kumpiskado man ki alyas ‘Joe’ an sarong pidasong pinagtutubudan an shabu asin duwang pidaso man nin plastic sachets an nakumpiskar ki alyas ‘Jun’.
Kinakarkulong igwa nin gabat na 4 grams asin nagkakantidad an mga ini nin P27,200. Dati ng nakulong si Alyas ‘Ric’ sa kaparehas na kaso alagad sigon sa suspek, huli sa kawaran nin regular na trabaho asin pagtios, kaya ini nagpapabakal kan ipinagbabawal na droga.
Sa ngunian nasa kustudiya na kan mga otoridad an mga suspek asin nahahampang sa kasong pagbalgar sa Comprehensive Dangerous Drugs Act of 2002 an tolong suspek.
