Haros sarong milyon o eksaktong 961,346 na Pilipino an nakabakal nin baratong P20 kada kilong bagas kan Setyembre sa irarom kan programang “Benteng Bigas, Meron Na!” kan gobyerno.
Segun sa datos kan Department of Agriculture, ini na an pinakahalangkaw na bulanan na bilang kan mga benepisyaryong natabangan kan programa poon kan ilunsar ini kan nakaaging taon.
Kabali sa mga nakinabang an mga senior citizen, indigent, solo parent, PWD, mga paraoma, parasira, asin minimum wage earner na labi na pinapasan an halangkaw na gastos sa pagkakan.
Sinabi ni Agriculture Secretary Francisco P. Tiu Laurel Jr. na poon Enero sagkod Setyembre, sobra 5.6 milyong Pilipino na an direktang natabangan kan programa.
Tanganing mas maparikas an distribusyon asin magkaigwa nin espasyo an mga bodega kan National Food Authority para sa mga bagong ani, pinapahugot na an mga benepisyaryo na makua an saindang bulanan na 30-kilong alokasyon sa sarong bagsakan poon Disyembre.
Katuyuhan kan administrasyong Marcos na padagoson an programang ini sagkod sa pagtapos kan termino sa Hunyo 2028 tanganing padagos na matabangan an mga tius na pamilya mantang sinusuportaran man an mga lokal na paraoma.
