Pigklaro kan sarong ekonomista na an halipot na panahon na pagbukas kan Strait of Hormuz dai pa nin tulos na epekto sa ekonomiya kan Pilipinas.
Sa intrevista kan Bombo Radyo Naga ki Dr. Emmanuel A. Onsay, CPA (Economist and Assistant Professor, Partido State University), sinabi kaini na dawa pigkakarkulong 20 porsyento kan supply nin lana sa bilog na kinaban an nag-aagi sa nasabing ruta maritime, an epekto kaini sa lokal na merkado dae tulos namamatian huli sa halawig na panahon nin transportasyon kan mga barkong lana, na posibleng maghaloy nin pirang semana bago makaabot sa nasyon.
Ipinaliwanag man na an dai pa sana nahahaloy na rollback kan presyo kan produktong petrolyo bakong direktang resulta kan pagbukas kan Strait of Hormuz, kundi nakabase sa mga hiro kan presyo sa Singapore, na nagseserbing benchmark para sa presyo kan langais sa Asya.
Alagad, nagpapatanid an ekonomista na an pirming pagbukas asin pagsara kan nasabing ruta pwedeng magin kawsa nin volatility o marikas na paghiro kan presyo kan langis sa global market. An sitwasyon na ini pwedeng magresulta sa paglangkaw kan presyo kan krudo, na iyo an magtutulod sa gastos sa transportasyon, kuryente, asin iba pang mga pundamental na barakalon.
Dugang pa, an inaapod na cost-push inflation, kun saen an presyo kan mga produkto nag-tataas huli sa naglangkaw na gastos sa produksyon, partikularmente an enerhiya, piglalaoman na magrabe.
Sa ibong kaini, pigrerekomendar kan mga eksperto an paghanap nin alternatibong pinagkukuanan nin lanngis, pagpakusog kan lokal na industriya nin enerhiya, asin pag-implementar nin magkakanigong polisiya tanganing mabawasan an epekto kan klaseng ini nin krisis sa ekonomiya kan nasyon.
An kamugtakan sa Strait of Hormuz nagtitinir na sarong geopolitical na agyat na may mahiwas na implikasyon bako sana para sa Pilipinas kundi para sa bilog na ekonomiya kan kinaban.
