NAGA CITY – Pigpaliwanag kan sarong Attorney an madapit sa Political Dynasty na nag-iiral sa nasyon.
Sa entrevista kan Bombo Radyo Naga ki Atty. Abelardo Quilaton Jr, Legal Practitioner, CEO, Owner, Quilaton Law Office, sinaysay kaini na an political dynasty an nangyayari sa mga miyembros kan pamilya na igwang posisyon sa gobierno.
Halimbawa kun an sarong alkalde an pigsalidahan kan saiyang agom o aki.
Katakod digde, an nasambitan ng political dynasty an dae pigkokonsiderar na iligal sa ngunyan huli ta igwang probisyon an constitution na piglilimitaran an nasambitan political dynasty.
Alagad pigsaysay kan supreme court na ini an bakong self-executive kun saen ini an prinsipyo asin pigsasabuhay kan konstitusyon.
Dugang pa ni Quilaton, kaipuhan pa na igwang sarong ley an maipasar tanganing ma-approve asin kaipuhan na idulok sa mga abogado tanganing dagusan nang ipagbawal.
Sigun pa ki Quilaton, igwang bill o an pig-aapod na anti-political dynasty bill na pigbubusol ngunyan kun saen ini an igwang magayon na obheto na maski an konstitusyon an pig-eenkaminar na maipasar ini alagad sa realidad soboot masakit ining maipasar huli ta maski an mga naggigibo nin ley an gikan sa political families kun saen ini an dapat na mai-imoplementar sa gabos na lider kan gobierno kaibahan an public support asin legal change sa sistema kan politika.
Pigtawan-duon pa ni Quilaton na enkaso ma-implemantar ini nin marhay makakatabang nin dakula tanganing mabawasan an korapsyon asin an pag-abuso kan kapangyarihan huli ta an posisyon sa gobierno an dae na maipapasa sa sarong pamilya.
Sa ngunyan, pagirumdom na sana ni Quilaton sa gabos na mga Pilipino na magin matalino sa pagpili nin kandidato asin dae magbase sa kun sisay an sikat dapat hilingon kun ano an plano, abilidad magin an integridad kan mga ini tanganing magkaigwa nin marhay na futuro an Pilipinas.
