Nangangapudan an sarong opisyal kan barangay sa Barangay Tambo, Pamplona, Camarines Sur nin dugang na suporta asin tabang para sa mga Persons with Disabilities (PWD) sa saindang lugar, katakod kan soboot kakulangan nin ayuda na naresibe hale sa manlaen-laen na ahensya kan gobyerno.
Sa intrevista kan Bombo Radyo Naga ki Patricia Briones, Barangay Kagawad, Chair Committee on PWD – Barangay Tambo, Pamplona, Camarines Sur, pighiras kaini na kada taon nagtatao sinda nin diit na tabang kada Oktubre asin Nobyembre na gikan sa 1% budget kan Gender and Development (GAD).
Sa presente, igwa na nin 65 na rehistradong PWD members sa barangay. Igwa man sinda nin organisadong pakikiasosyar sa mga opisyal asin nagkakaigwa nin regular na mga pagtiripon sarong beses kada bulan, kada huring Sabado. Kabale sa saindang pinag-uulayan iyo an mga deretso kan PWD asin an pangangaipo na maseguro na itinatao kan gobyerno an mga benepisyo na maninigo sa sainda.
Pigduon man kan opisyal an importansya kan pagkakaigwa nin tamang dokumento, arog kan PWD ID, tanganing tulos na makaresibe nin ayuda hali sa gobyerno. Alagad, aminado ini na kadakol na mga programa asin ayuda an dai nakakaabot sa saiyang barangay.
Dugang pa kaini, dawa ngani may panahon na nagtatao nin ayuda an municipio asin kapitolyo, partikularmente sa panahon nin Disyembre, kulang pa ini tanganing masimbagan an mga pangangaipo kan mga PWDs, lalo na an mga may grabeng diperensya.
Ipighiras man kaini an nagkapirang problema sa pagdistribuer nin ayuda, kun saen may mga pagkakataon na an ibang ahensya direktang nagtatao nin asistensya sa mga eskwelahan o mga piling indibidwal na dae man pigpapaaram an barangay. Kawsa kaini an kawaran nin koordinasyon asin bakong makatanosan na distribusyon nin ayuda.
Sa ibong kaini, pigsierto kan opisyal na sa lebel kan barangay, pighihingoha ninda na matawan nin asistensya an gabos na rehistradong PWD na mayong pinipiling.
Nangapudan ini sa gobyerno asin sa mga may marhay na boot na magtao nin dagdag na suporta sa PWD sector, orog na sa tahaw kan padagos na paglangkaw kan presyo kan mga barakalon.
