Apektado an sampulong banwaan sa Bicol Region kan African Swine Fever o ASF, na padagos na pigbabantayan kan mga awtoridad tanganing maibitaran an paglakop kan helang sa mga domestic pigs.
Sa intrevista kan Bombo Radyo Naga ki Lovella Guarin, D.A Bicol Spokesperson, sinabi kaini na padagos an pagkondusir nin surveillance asin monitoring sa mga lugar na may nairehistro na ASF. An mga banwaan na igwa nin positibong kaso kan ASF sa probinsya kan Caamrines Sur iyo an Nabua, Ragay, Pamplona, Pili, Libmanan, Sipocot, Del Gallego, Iriga City, mantang sa Virac, asin Pandan Catanduanes an nakapagrehistro nin kaparehong kaso kan helang.
Pig-eenkaminar an mga paraataman nin baboy na istriktong magsunod sa mga lakdang sa biosecurity, kabali na an regular na paglinig asin pagdisinfect kan mga kulungan asin kontrolon an paglaog kan mga tawo, lunadan asin iba pang potensyal na carrier kan virus.
Dawa ngani an ASF dai nakakaulakit sa tawo, pwedeng magkawsa ini nin dakulang kapierdihan sa mga paraataman nin orig asin makaapektar sa suplay asin presyo kan mga produktong orig.
Pinapagirumduman man an publiko na makikooperar sa mga otoridad asin tulos na isumbong an ano man na makaduda na helang o biglang pagkagadan kan mga orig ngani maibitaran an posibleng paglakop kan ASF.
