NAGA CITY- Nagpapadagos an ginigibong lakdang kan pamayuhan kan Ocampo National High School tanganing masimbagan an kakulangan kan saindang eskwelahan sa mga classroom.
Sa entrevista kan Bombo Radyo Naga ki Nerio Melano Sibulo III, Principal III kan Ocampo National High School, sinaysay kaini na padagos an saindang pagpapatugdok kan pig-aapod na temporary learning center.
An nasambitan ng temporary learning center an maserbeng classroom kan mga estudyante kun saen an iba digde an gibo man sa kahoy o bamboo.
Sigun sa opisyal, 10 temporary learning center an saindang target tanganing mapanuan an kakulangan sa 24 na classroom kan saindang eskwelahan.
Katakod digde, liwat man na kinalampag kan Principal an opisina kan Department of Education Secretary Sonny Angara na madangog an saindang agrangay orog na ta kulang man soboot an saindang nakukua na suporta gikan sa Central Office.
Igwa man nag-donar nin building gikan sa Pagcor, asin sa iba pang indibidwal siringman nakakua man sinda nin suporta gikan sa Munisipyo alagad nagtitinir na kulang an pigkokonstruher na pasilidad sa saindang eskwelahan.
Paliwang ni Sibulo, igwang epekto sa pagkanood kan mga estudyante an kakulangan sa mga classroom kaya saindang ginigibuhan nin paagi tanganing masimbagan ini asin mabawasan an problema.
Sa ngunyan, hagad na sana kan opisyal sa mga estudyante asin mga magurang an saindang kooperasyon sa pagsimbag sa nasambitan ng angat.
