Ipinaluwas na kan Commission on Elections sa syudad nin Naga an schedule para sa Satellite Voter’s Registration sa manlaen-laen na barangay ngunyan na bulan nin Marso.
Sa entrevista kan Bombo Radyo Naga ki Election officer Atty Maico Julia Jr., ginibo an satellite registration kasuodma, Marso 4, sa Barangay San Francisco, mantang nakatalaan na magbisita an opisina sa Barangay San Isidro ngonian na aldaw, Marso 5, saaga, Marso 6 sa Barangay Sta. Cruz, kan Marso 12 sa Barangay Tinago, Marso 13 sa San Felipe, Marso 19 sa Triangulo, asin Marso 20 sa Barangay Tabuco.
Base sa record kan Comelec Naga, pigkakarkulong 2,400 an mga rehistradong botante kan nakaaging taon, na may paglangkaw nin labi sa 2,000 na bagong rehistradong botante puon Enero sagkod Pebrero ngonian na taon. Mientras tanto, nakatalaan an pag-file kan Certificate of Candidacy poon Setyembre 28 sagkod Oktubre 5, 2026.
An panahon nin kampanya poon Oktubre 22 sagkod Oktubre 31, mantang an panahon nin pirilian poon Oktubre 3 sagkod Nobyembre 9, segun sa kalendaryo kan mga aktibidad kan komisyon.
Ineengganyar kan opisina an mga kwalipikadong residente na aprobetsaran an natatadang panahon nin pagparehistro.
