Madistribwer an LGU Pasacao nin mga school supplies sa gabos na estudyanteng nag-eeskwela sa mga pampublikong eskwelahan sa banwaan.
Sa paghamapng sa mga Kagawad kan Media ni Mayor Niño Tayco kan Local Government Unit kan Pasacao, sinabi kaini na bilang suporta kan lokal na gobyerno sa sektor kan edukasyon madistribwer ninlibreng School Supplies. Obheto kaini na matabangan an mga magurang asin estudyante sa pagpreparar para sa pagbukas kan klase.
Segun ki Mayor Tayco, benepisyaryo kan distribusyon an mga estudyante hale sa Daycare Center, Grade 1 sagkod Grade 6, Junior High School, Senior High School, asin pati na an mga kabilang sa Alternative Learning System o ALS. Pigheras kan alkalde na importante an pagtao nin libreng gamit sa eskwela tanganing magkaigwa nin mas marahay na oportunidad an mga kaakian sa pag-adal.
Dakula an naitabang kan programang ini lalo na sa mga pamilyang apektado kan nagtataas na presyo kan mga pangunahing pangangaipo. Tanganing mabawasan an gastos kan mga magurang, nagdesisyon an lokal na gobyerno na maglaan nin pondo para sa school supplies. Sa paaging ini, mas mapapadali an paghahanda kan mga estudyante para sa bagong taon nin pag-eskwela.
Dagdag pa kan alkalde, saro sa mga pangunahing rason kun tano may mga kaakian na dai agad naipapaenrol kan saindang mga magurang iyo an kakulangan nin gamit sa pag-adal. Kun mayo nin notebook, lapis, asin iba pang kagamitan, nagkakaigwa nin kabug-atan sa mga magurang na pig-aatubang an krisis ekonomiko. Huli kaini, naglalaom an LGU na an simpleng tabang na ini makakapagdasig sa mga magurang na ipadagos an pag-eskwela kan saindang mga aki.
Padagos man an pangapudan kan LGU Pasacao na suportahan an edukasyon tanganing magkaigwa nin mas marhay na futuro an mga kaakian kan banwaan.
