Kinumpirmar kan Department of Justice na liwat pigpapadagos an ikinasa kaining ‘search and retrieval operations’ sa Taal lake. Sigun mismo ki Secretary Jesus Crispin Remulla, on-going na giraray an paghahanap kan mga awtoridad sa nasambitan ng lawa.
Ini an huli sa naeeksperyensyhan na panlalamasa kan hagupit kan habagat asin maraot na kamugtakan kan panahon dara kan nakalihis na bagyo.
Kaya man pigheras kan presenteng sekretaryo kan kagawaran na liwat na nagpapadagos na an operasyon tangani matukoy o mahanap an soboot lawas kan mga nawawarang sabungero.
Aminado man ini na an pagsasagibo o pagpapadagos kan ‘search and retrieval operations’ an dae ninda kontrolado huli ta ikinukunsiderar man an kamugtakan o sitwasyon kan panahon. Isinasaalang-alang man kaya an kasalbaduhan orog na kan mga technical divers na iyong nangengenot sa pagsisid o paghahanap sa irarom kan katubigan kan lawa.
Mantang an patungkol man sa urulay nin hararumang pagsusuri sa mga narekober kan Philippine Coast Guard, hurot kaining dae ini pwedeng hidalion. Partikular sa DNA testing, na kaipuhan mag agi pa an mga narekober na buto sa halabang proseso matukoy sana an magigin resulta kaini.
Plano kaya kan nasambitan ng kagawaran na isairarom sa pagsusuri an DNA results asin DNA samples kan kaparientes kan mga nawawarang sabungero enkaso na makua na an resulta kaini. Kun saen mawot nindang maaraman kun an mga ini an matugma na iyo man an pwedeng makapagpatibay o makatabang komo ebidensya sa isinasagibong ‘case buildup’ kan Department of Justice.
Katakod pa kaini, pigheras pa ni Secretary Remulla an pagkakaigwa nin panibagong testigo na kapot ngunyan kan kagawaran.
Ini soboot an makakatabang tangani mas mapagtibay an kredibilidad kan lumantad na testigong si alyas ‘Totoy’, may tunay na pangaran na Julie ‘Dondon’ Patidongan.
