Pigpahimutikan ni Senator Rodante Marcoleta na nagseserbe ini komo abogado kan mag-agom na Curlee asin Sara Discaya, taliwas sa puna kan kadaklan na pigtabangan kaini an mag-agom, kasunod na man kan mga serye kan pagdangog kan Senate Blue Ribbon Committe dapit sa flood control scandal.
Susog sa sarong pahayag, sinaysay ni Marcoleta na pigkuwestiyon sana kaini an paggamit sa restitution komo requirement sa pagreseber sa Witness Protection Program (WPP).
Sigun ki Marcoleta, piggamit kan Department of Justice an restitution tanganing limitahan an mapipiling maisairarom sa WPP.
Nanindugan an lehislador na dae kaipuhan kan restitution kun nag-apply pa sana an sarong indibidwal asin saka pa sana magkakaigwa nin civil indemnity o bayad-danyos kun igwa nang desisyon an korte.
Pigkakahaditan ni Marcoleta na an pagpipirit kan DOJ na pagbayadon an mga personalidad na nagmamawot magin state witness pupuunan kan korapsyon, huli ta mayo ini sa ley.
Sigun pa sa Senador, bako an mag-agom na Discaya an saiyang ipagtatanggol sa pagkuwestyon sa restitution.
Nagkataon sana na an mag-agom na kontraktor an enot nag-apply para sa WPP asin sa puon sana pigpipirit na ni dating DOJ Sec. Jesus Crispin na dapat munang magpuli an mga ini kan saindang mga ‘pighabon’ na kwarta, bagay na dae pigtutugutan kan ley.
Nanindugan an Senador na an WPP dapat para sa gabos kan mga kwalipikadong testigo na bilog an buot na matabang sa gobierno.
