Ipinasa na kan Senate Blue Ribbon Committee sa Office of the Ombudsman an imbestigasyon dapit sa mga soboot anomalya sa flood control projects. Ini tanganing maparikas an imbestigasyon asin maibitaran an pagdoble kan mga proseso.
Segun ki Blue Ribbon Committee Chairman Senador Erwin Tulfo, pinag-olayan niya, Senate President Sherwin Gatchalian asin Ombudsman Jesus Crispin Remulla na mangengenot an Ombudsman sa mga bagay na may kinaaraman sa flood control projects. Nag-orolay an tolo kan nakalihis na Biyernes sa opisina sa Ombudsman sa Quezon City.
Sinabi ni Tulfo na nagpoon na man sa paggamit kan Ombudsman an mga dokumento na isinumitir kan Independent Commission for Infrastructure. Kabale sa pig-iimbestigaran iyo an nagkapirang kongresista, kontratista, opisyales kan gobyerno, nagkapirang senador asin iba pang halangkaw na opisyales kan gobyerno.
Sigon ki Tulfo, padagos an pag-asenso kan imbestigasyon kan Ombudsman. Huli kaini, dae man suboot kinakaipuhan na makialam an Blue Ribbon Committee sa kaparehong bagay tanganing dae maatraso o maapektaran an proseso kan imbestigasyon.
