Piglalaomang malangkaw an presyo kan mga produktong petrolyo sa masunod na semana, sigun sa Department of Energy (DOE) kasuodma, aldaw nin Biyernes.
Basado sa apat na aldaw na Mean of Platts Singapore (MOPS) trading, pigkakarkulong malangkaw nin poco mas o menos P0.95 kada litro an gasolina, P0.10 an diesel, asin P0.25 an kerosene.
Sigun ki DOE-Oil Industry Management Bureau (OIMB) assistant director Rodela Romero, ibabase pa an pinal na price adjustment sa resulta kan MOPS trading kan nakalihis na Biyernes asin sa pagdugang nin operating cost asin iba pang premium kan mga oil company.
Ipinaliwanag ni Romero na an piglalaomang paglangkaw kan presyo an dara kan geopolitical tensions sa Iran, kaibahan an huma kan pagkaantala kan suplay sa Strait of Hormuz asin an kawaran nin kasiertuhan sa ulayan kan Iran nuclear talks.
Binanggit man kaini an mga report na pwedeng ulangan kan Estados Unidos an mga barkong nagpapadara nin Iranian crude.
Karaniwang pig-aanunsyar kan mga oil company an opisyal na price adjustment tuyong aldaw nin Lunes, na pigpapautob sa aldaw nin Martes.
