Pinahimutikan kan Department of Justice na kabali sa iniluwas na opisyal na listahan kan mga inirerekumendang makasuhan kan National Bureau of Investigation si dating House of Representatives Speaker Martin Romualdez.
Sa ibong kan pagigin imbwelto soboot kaini sa maanomalyang flood control projects, kinumpirmar kan kagawaran na dae pa kabali digde an nasambitan ng lehislador.
Kan nakalihis na aldaw kaya, opisyal kan iniluwas kan Department of Justice an mga pangaran na inirerekumendang makasuhan kan kawanihan.
Bagaman mayo an pangaran ni Cong. Romualdez, nangengenot sa listahan kaini iyo sinda Ako Bicol Party-list Rep. Zaldy Co, mga senador na sinda Chiz Escudero, Joel Villanueva, Jinggoy Estrada, former Senator Bong Revilla, asin iba pa.
Kaya man ipinaliwanag kan presenteng sekretaryo kan Department of Justice na si Sec. Jesus Crispin ‘Boying’ Remulla kun tano dae ini ibinali.
Digde kaini itinukdo na an dae pagsipot kan testigong si Orly Regala Guteza sa nakatalaan kuta na paghihilingan ninda an iyong rason para sa ‘exclusion’ kan kongresista.
Hurot ni Justice Sec. Remulla, kinakaipuhan pa munang maberipika asin magsairarom sa ebalwasyon an mga akusasyon asin alegasyon kaini na nagiimbwelto ki former House Speaker Martin Romualdez.
Mantang pigtawan duon man kan sekretaryo na an Witness Protection Program an dae nangangahulugang para sa pagtataong proteksyon sana.
Katakod sa naenot na pahayag ni Orly Guteza na dae kaini kaipuhan pa nin dugang na seguridad, pighurot ni Sec. Remulla na kalakip sa programa pati an mga posibleng isiwalat pa kan testigo.
Mientrastanto, apwera pa ki Cong. Romualdez, an presenteng alkalde kan Makati na si Nancy Binay an dae man napabali pa sa listahan kan mga inirerekumendang makasuhan.
Alagad sigun ki Justice Secretary Remulla, sainda na ining pinoproseso na kasunod kan idawit an alkalde sa nangyari na pagdangog sa Senado.
Sa presente, nagpapadagos pa man an imbestigasyon kan Department of Justice asin pagberipika kaini sa mga testimonyang nakukua gikan sa mga testigo.
