Pig-depensahan ni South Korean President Yoon Suk Yeol an saiyang martial law decree sa saiyang liwat na pag atubang sa publiko ngunyan na aldaw nin Huwebes, Disyembre 12.
Pigsaysay ni Yoon na dai kaini intensyon na raoton an constitutional order kan pig deklarar kaini an martial law kan Disyembre 3 asin magpadara nin ginatos nin mga tropa sa National Assembly.
Piggibo soboot ini tanganing isalbar an saindang nasyon sa inaapod na “anti-state” opposition parties. Pigsaysay kaini na ginamit kan oposisyon an saindang mayorya sa Asembly tanganing maparalisa an saindang nasyon.
Sinabi man ni Yoon na an saiyang aksyon parte kan saiyang mga kapangyarihan sa konstitusyon komo Presidente asin dai ini nagpapahiling nin insureksyon siring sa pag akusar saiya kan oposisyon. Kaya man nanindugang si Yoon na makikipaglaban ini hasta sa katapusan.
Mientrastanto, antes an pinakabagong speech ni Yoon, nagpahayag na nin suporta an ruling party na People Power na partido man ni Yoon sa saiyang impeachment.
Enot nang pig inkaminar kan partido si Yoon na magbutas na sa saiyang pwesto sa Pebrero o Marso huli suboot ini an pinakamarikas na paagi tanganing matapos an kariribukan sa pulitika sa saindang nasyon na suboot pinalala kan short-term declaration of martial law.
Magigiromdoman man na enot na nagsayuma an ruling party na suportaran an impeachment ni Yoon kan nakalihis na Sabado asin pigboycott ini sa paglaom na mabutas na sa pwesto an Presidente.
Alagad sinabi kan liderato kan ruling party na mayo nin progreso sa saindang mga pagprobar na kumbinsiron si Yoon na magbutas.
Sa lado man ni Pres. Yoon, nanindugang ini na matinir ini sa iyang pwesto asin enkaso na ma-impeach, ipaglalaban ini sa Constitutional Court.
