NAGA CITY- Masagibo an South Korea nin loudspeaker broadcasts pasiring sa North Korea, sigun sa saindang National Security Council, ini an makalihis na liwat magpadara an Pyongyang nin mga lobo sa border na may bitbit na basura.
Nagpatanid an South Korea na gagamiton ninda an “unendurable” measures kontra sa North Korea para sa pagpapadara kan mga nasambitan ng lobo. Nagpuon an Pyongyang na magpadara nin mga lobo na may bitbit na basura asin ati sa border kan Mayo asin sinaysay na an lakdang an pagbalos sa mga leaflets na anti-North Korea na ipinadara kan mga aktibista gikan sa South komo parte kan sarong propaganda campaign.
Kan Hunyo 2, sinaysay kaini an paramientras sindang mauntok sa pagpapadara nin mga lobo nin huli ta an 15 tonelada kan basura na ipinadara kaini an marahil bastante na para ipaabot an mensahe kun gurano nakakasuklam an anti-North leaflets.
Siringman, pigpromesa kaini na magpapadagos ini enkaso liwat mangyario an mga leaflets gikan sa South sa paagi kan pagpapadara nin ginatos na basura.
An mga broadcast kan South Korea an pinapaluwas gikan sa kadakol na loudspeaker na nakatambak sa darakulang rack na may kasabay na mga barita sa bilog na kinaban asin impormasyon dapit sa demokratiko asin kapitalistang lipunan na may halo kan popular K-pop music.
Pinagtutubodan na an tanog na mapakol sa labi 20 kilometro (12.4 milya) pasiring sa North Korea. Sinayasay man kan militar kan South Korea na an North an nagpapalupad nin nasa 330 lobo na may bitbit na basura puon Sabado asin nasa 80 digdi an nagbagsak na sa South.
