Nagpasalamat si Speaker Ferdinand Martin G. Romualdez sa gobyerno kan Estados Unidos para sa dugang na ₱13.8 milyon ($250,000) kantidad na tabang para sa emergency shelter asin hygiene kits para sa 3,000 pamilyang naapektaran kan pagbaha kan nakalihis na Hulyo dara kan habagat.
Sinaysay ni Speaker Romualdez na an tabang an patotoo kan matibay asin haloy nang pagigin amigo kan Pilipinas asin Estados Unidos.
Pigtawan-duon kaini na an bagong tabang an nagpapahiling kan padagos na suporta kan haloy nang kaalyado sa panahon kan pangangaipuhan.
Binanggit kan beteranong lehislador gikan sa Leyte na apwera sa tulos na pagtabang sa mga biktima kan baha, pinatitibay man kan tabang kan Estados Unidos an hararom na koneksiyon kan duwang nasyon na nakabase sa pagtitiwala, magkakapararehong pagtataong importansiya, asin pag-iribahan na pamarhayon an buhay kan mga mamamayan.
Kan nakalihis na Biyernes, pig-anunsyar kan U.S. Embassy sa Manila an dugang na pondo para sa pagheras nin emergency shelter materials asin hyigiene kits sa poco mas o menos 15,000 indibidwal na nagtitinir sa mga evacuation center sa mga probinsiya kan Rizal, Laguna, Bulacan asin Pampanga.
Sa tabang na ini, nagpakol na sa kabilogang ₱27.6 milyon ($500,000) an tabang kan Estados Unidos para sa mga disaster response efforts sa Pilipinas.
An International Organization for Migration (IOM) kaibahan an Department of Social Welfare and Development (DSWD) an matao nin tarpaulin, repair kits, asin mga gamit sa mga pamilyang naraot o nadanyaran an mga harong.
Kaibahan sa lambang kit an mga primerong gamit sa konstruksyon tanganing makapagpuon an mga pamilya sa liwat an pagpapatindog kan saindang mga harong.
Matao man nin hygiene kits na naglalaog nin sabon, balde, asin mga gamit panlinig, mantang imo-monitor kan IOM an kalinigan sa mga evacuation center tanganing malikayan an paglakop kan helang.
Sigun ki U.S. Embassy Chargé d’Affaires ad interim Y. Robert Ewing, taos-pusong nagpapasalamat an sa pakikipagtabangan kan IOM, World Food Programme (WFP), DSWD, asin Office of Civil Defense tanganing makatabang sa pagbuhat asin pag-ahon kan mga pamilyang naapektaran.
Kasuarin sana naglaan na an gobyerno kan Estados Unidos nin ₱13.8 milyon ($250,000) sa paagi kan World Food Programme (WFP), na nakapagtao nin 47,700 food packs para sa labi 200,000 benepisyaryo sa Northern asin Central Luzon.
Katuwang man kan mga eroplano kan militar kan US an Armed Forces of the Philippines sa paghahatod kan 6,300 food packs para sa 18,000 indibidwal sa Batanes.
Pig-enkaminar ni Speaker Romualdez an DSWD na siertuhong magigin marekas asin transparent an pagheheras kan pinakabagong tabang.
Pig-enkaminar man ni Romualdez an iba pang ahensya kan gobyerno asin mga lokal na gobyerno na pakusugon an suporta sa tabang kan U.S. sa paagi kan pagsierto na igwang bastanteng access an mga pamilyang nasa evacuation centers sa malinig asin salbadong pasilidad para sa kalinigan asin sanitasyon.
