Sa pagselebrar kan National Heritage Month, tinawan duon kan sarong eksperto an kulturang Bikolano na an tataramon na Bikol asin an katakod na kultura nagtitinir na buhay asin padagos na nag-aadaptar sa modernong panahon, orog na sa tahaw kan impluwensya kan social media asin globalisasyon.
Sa intrevista kan Bombo Radyo Naga ki Dr. Christian C. Vega (Chairperson, Sentro Ng Wika, Kultura sa Sining, Cbsua-Calabanga), saiyang sinabi na dai “nagagadan” an tataramon na Bikol kundi padagos na nagtatalubo asin nagbabagay sa mga bagong porma nin komunikasyon.
Segun ki Vega, an padagos na paggamit kan Bikol mahihiling sa social media, vlogs, asin manlaen-laen na digital platform, na patunay na nagdadanay na buhay an tataramon sa ibong kan modernisasyon. Tinawan duon kaini na an pagbabago bakong kawaran kundi adaptation kan kultura sa panahon.
An standardization asinintellectualization kan tataramon na Bikol, siring man an mga inisyatiba kan mga institusyon arog kan mga unibersidad asin kan Commission on Higher Education sa pag-implementar kan Mother Tongue-Based Multilingual Education (MTB-MLE) asin pagbilog nin mga programa arog kan Bikol 101 tanganing orog pang mapararom an pag-adal kan tataramon na rehiyonal.
Tinawan man nin duon ni Dr. Vega na an tataramon asin kultura magkakonektar asin dai dapat hilingon sa perspektibo nin sarong “mas halangkaw” o “mas hababang” tataramon. Sinabi niya na an pagkakaiba-iba kan mga tataramon sa Bikol sarong patunay kan yaman sa kultura kan rehiyon.
Saro pang punto nin atensyon iyo an papel kan social media sa pagpalakop kan tataramon na Bikol, kun saen dakul na mga jovenes content creators an naggagamit kaini tanganing ipahiling an saindang pagkatawo asin orgulyo sa pagiging Bikolano.
Sa katapustapusi, inenkaminar kan eksperto an mas dakulang partisipasyon kan lambang saro sa pagpreserbar kan tataramon asin kultura, magpoon sa laog kan harong sagkod sa eskwelahan asin komunidad. Saiyang sinabi na nakadepende an pagpapadagos kan tataramon na Bikol sa kolektibong paggamit, pagkamoot, asin aktibong pagpasa kaini sa masurunod na henerasyon.
Sa kabilogan, an tataramon na Bikol nagtitinir na buhay asin dynamic—bakong nawawara, kundi padagos na nagbabago sa paglipas kan panahon.
