Sarong abogado an nagklaro kan mga probisyon kan Republic Act No. 1405 o Bank Secrecy Law, na may katuyuhan na protehiran an confidentiality kan mga deposito sa bangko asin mamantenir an kumpiyansa kan publiko sa sistema pinansyal kan nasyon.
Sa intrevista kan Bombo Radyo Naga ki Atty. Mark Kevin A. Arroco (Abogado), an nasabing ley pigpasar ngani na engganyaron an mga namamanwaan na magdeposito kan saindang cuarta sa mga bangko imbes na itago sa ibang lugar. Sa irarom kan ley, an privacy kan gabos na klase nin deposito, ano man an kantidad o estado kan nagdeposito, ginagarantiyahan bilang sarong “protective shield” laban sa dai awtorisadong inspeksyon.
Alagad, piglinaw kan abogado na bakong absolute an pagtago kan bangko. Igwa nin apat na espesipikong pangyayari kun nuarin an sarong bank account pwedeng buksan o inspeksyunon: kun an depositor igwa nin nakasurat na pagtugot; sa mga kaso nin impeachment; kun igwa nin pagboot kan korte na may relasyon sa panunuhol o dai pagsunod sa trabaho; asin kun an deposito mismo iyo an tema nin sarong kaso sa korte.
Pinag-olayan man sa interbyu an pagkakaiba kan proteksyon kan mga deposito sa peso asin foreign currency. Mantang an mga kwenta sa peso kompidensyal, an mga deposito sa ibang nasyon pigkokonsiderar na “absolutely confidencial” asin parati nangangaipo nin pagtugot kan depositor antes ini ma-eksamin. Alagad, sarong desisyon kan Korte Suprema an nagtutugot sa pag-garnish kan sarong foreign currency account tanganing magtao nin hustisya sa sarong biktima nin krimen, na nagpapahiling na an ley dai dapat magin ulang sa paghatod nin hustisya.
Katakod kaini, ipinaliwanag ni Arroco na dae pwedeng gamiton bilang kalasag sa mga iligal na aktibidad an Bank Secrecy Law huli sa eksistidong Anti-Money Laundering Act (AMLC). Sa irarom kaini, an mga bangko obligadong magreport nin mga kaduda-dudang transaksyon sa Anti-Money Laundering Council (AMLC), kabali an darakulang deposito na minaabot sa sarong itinalaan na threshold.
Tinawan man nin duon kaini an importansya kan pagkaaram kan publiko sa saindang mga deretso asin obligasyon komo mga depositor. Pigrerekomendar na basahon an ley mismo, sunudon an maninigong proseso sa mga kaso na may kinaaraman sa mga pandadaya, asin magsangat nin reklamo laban sa siisay man na nagbabalga kan probisyon nin sekreto kan bangko.
Sa kabilogan, dawa istrikto an proteksyon kan mga deposito sa bangko sa Pilipinas, igwa ining malinaw na limitasyon tanganing maseguro na dai maaabuso an sistema asin mantinir an hustisya.
