NAGA CITY – Pigkundusir kan Comelec Calabanga an supervision kan Local Absentee Voting sa 91B, 91D Philippine Army.
Sa entrevista kan Bombo Radyo Naga ki Atty Emilia Queng Bueza, Election Officer, Comelec Calabanga, sinaysay kaini na tapos nang makapag boto an personnel kan Phil Army na nakadestino sa sarong kampo sa nasambitan ng banwaan.
Sa paagi kaini dae maapektaran an saindang election duties sa mismong aldaw nin pirilian sa Mayo 12.
Sigun pa ki Bueza, mahigot na binabantayan sa presente an ano man na pangyayaring may imbwelto nin vote buying, asin vote selling.
Mahigot na pigtawan duon kaini na bako sana an nagtatao an igwa nin ofense kundi pati man an mismong pigtatawanan. Kabali sa pinagbabawal na pagheras nin ayuda ngunyan na paparaning pirilian, iyo an mga prpgramang siring kan AICS, TUPAD asin AKAP.
Kasunod kaini iyo an liqour ban, an pagbabawal sa pag inom asin pagbabakal nin arak na ipapaputob magpuon Mayo 11 hasta 12.
Sa paagi kaini makakalikay sa ano man na klase nin mararaot na insidente sa oras kan borotohan.
Dugang pa kan opisyal, igwa man nin itatalagang Voter’s assistance desk para man sa igwa nin ano man na kahaputan an lambang mga ma boto sa kada eskwelahan sa lugar.
Sa ngunyan, pagirumdom pa kaini na magin matalino pa man giraray asin displinadong mga botante sa aldaw kan pirilian.
