NAGA CITY- Nagpapadagos ngonian an pigigibong manhunt operation kan mga otoridad kontra sa sarong persona na suspek sa pananaksak sa Barangay Calimpak, Guinayangan, Quezon.
Basado sa report gikan sa Quezon Police Provincial Office, nakaresibe suboot nin apod an Guinayangan-PNP gikan sa Guinayangan Medicare Community Hospital na pinagdarahan sa biktimang si Maximo Lajara, 59-anyos na nagsapo nin saksak sa manlaen-laen na parte kan saiyang lawas.
Sa imbestigasyon kan pulisya, nagluwas na nag-iinuman sinda Lajara asin suspek na si Rogelio Mendoza alyas Ogie kan bigla ining magkaigwa nin diskusyon.
Nagkua suboot nin kutsilyo si Mendoza asin pinagsasaksak an biktima.
Sa ngonian, ipigpepreparar na man kan mga otoridad an kasong Frustrated Murder na isasangat kontra sa nakadulag na suspestado.
