NAGA CITY- Preparado an Solid Waste Management Office kan siyudad nin Naga na magtabang sa paghakot kan mga nabaklas na Campaign materials.
Sa entrevista kan Bombo Radyo Naga ki Engr. Joel Martin, pamayo kan SMWO-Naga, sinaysay kaini na naghahalat sana man sinda nin request gikan sa Comelec-Naga na naghahagad nin asistensiya sa paghakot kan mga campaign materials na mayo sa designated areas o mayo sa common poster areas.
Sigun ki Martin, preparado sindang magtabang orog na ta saindang mapapakinabangan an mga tarpaulins sa pagkriar nin manlaen-laen na produkto.
Paliwanag kan opisyal, an mga tarpaulins an raw materials na saindang pighahanap sa pagkriar nin school bags, fashion bags, eco bags asin iba pa sa paagi kan Waste diversion technology.
Dugang pa kan opisyal, gamit an waste clothing na gikan sa mga ukay-ukay asin tarpaulins sinda man an nakakakriar nin produkto na magagami kan mga estudyante asin pigtataong libre sa merkado publiko kan siyudad nin Naga.
Dae soboot masasayang an mga nabaklas na campaign materials ta igwa ining pakinabang sa lado man kan Solid Waste Management Office.
Sa ngunyan, pigtawan duon na sana kan opisyal na dakulang bagay an pagtarabangan kan lambang mga opisina kan lokal na gobierno tanganing magin matuninong an pagkundusir nin eleksyon.
