Dae na hahalaton pa kan Department of Justice (DOJ) an “tell-all affidavit” kan mag-agom na contractor na sinda Sarah asin Curlee Discaya.
Ini an tangani makapagsusunad nin mga kaukulang reklamo an DOJ kontra sa mga imbwelto sa maanomalyang flood control projects.
Sigun ki DOJ officer-in-charge (OIC) Fredderick Vida, mayo pang naisusumiter an Discaya couple nin “tell-all affidavit” na soboot igwa nin mga detalyes dapit sa korapsyon asin man sa soboot maanomalyang flood control projects.
Dae pa man soboot sinda kuntento sa testimonya kan mga ini dawa pa pirang beses na nagpasiring an mag-agom na Discaya sa DOJ.
Dugang pa ni Vida, dae na man ninda hahalaton an “tell-all affidavit” dawa pa an mga dating opisyal kan DPWH antes na magsunad nin kaso sa mga masunod na semana.
Enot nang kinumpirmar kan DOJ na provisionally accepted na sa witness protection program (WPP) an mag-agom na Discaya kaiba an dating opisyal kan DPWH, alagad padagos pa an pagsusuri para sa saindang posibleng pagsasairarom komo state witness.
Padagos soboot nindang pinag-aadalan ngunyan kun an mga pahayag kan mag-agom na Discaya asin iba pa an bilog o pili sana an saindang mga pinapangaranan.
