NAGA CITY- Nakapagparehistro an TESDA Regional Training Center Pili para sa NC III level program o early childhood care and development services NC III.
Sa entrevista kan Bombo Radyo Naga ki Marjorie Orosco, Public Information Officer kan TESDA Regional Training Center Pili, sinaysay kaini na obheto kan nasambitan ng lakdang an magtao nin training sa mga childhood o daycare workers.
Sigun ki Orosco, igwa soboot kaya nagkapira na mga daycare workers o daycare practitioners na mayong certification.
Katakod digde, dakulang katabangan an programa tanganing igwang sertipasyon na mabibitbit an mga nasambitan ng indibidwal bako sana an saindang mga skills.
Igwa na soboot ining kaibahan na certification na patotoo kan saindang kakayanan.
Dugang pa kan opisyal, an programa nagtatangro nin 38 aldaw na training kun saen an 28 days an para sa institutional based training mantang an 10 days an para sa OJT.
Mientrastanto, maogma man na pigheras ni Orosco na natapos palang an enot na pag-arangkada kan programa kun saen an benipisyaryo iyo man an mga daycare workers kan LGU-Pili.
Sa ngunyan, pigsierto na sana kan opisyal na padagos an saindang pagbilog nin mga programa na makakatabang sa komunidad asin mebebenipisyaran an nasyon.
