Kumpirmado na 7 an nagadan, kaiba na digdi an salarin, asin 15 an nairido pagkatapos kan nagin pambabadil na ginibo kan sarong 14-anyos na estudyante sa sarong eskwelahan sa luwas kan Bangkok, Thailand.
Nangyari an insidente sa prestihiyosong Debsirin Nonthaburi School sa Bang Kruai District, Nonthaburi province, na nasa hilagang-kanluran kan luwas kan Bangkok.
An suspek iyo an sarong 14-anyos na lalaking estudyante kan naturang eskwelahan. Ginamit kaini an sarong 9mm na badil na pagsasadiri kan saiyang lolo.
Segun sa report kan pulisya, antes magdiretso sa eskwelahan, binadil asin ginadan muna kan suspek an saiyang lolo asin lola sa saindang harong.
Pag-abot sa eskwelahan, nagpauran ini nin labi sa 26 na putok. Nagdara ini nin grabeng katakutan asin kaguluhan mantang nagtatago an mga estudyante sa laog kan mga classroom. Sa kabilugan pito an nagadan, kabali digdi an tolong maestro, duwang estudyante, asin an lolo asin lola kan suspek.
Pagkatapos kan krimen, naghugot man an suspek sa paagi kan paggamit kan saiyang badil. Sa 15 na nalugadan, may mga nagsapo nin lugad mantang nagkakagulo asin nagtatakas hale sa lugar. Duwa sa mga nalugadan an ngunyan nasa kritikal na kondisyon. Siring man sa report kan Department of Foreign Affairs (DFA), mayo nin Pilipinong nadamay o nalugadan sa naturang trahedya.
Padagos pa an imbestigasyon kan Royal Thai Police tanganing maisihan an motibo sa likod kan malagim na pag-atakeng ini.
Mientratanto, ligtas asin mayo man nin nakulugan sa walong Pilipinong paratukdo matapos an maduguong pambaadil sa eskwelahan.
An Thailand kabali sa mga nasyon na may pinakahalangkaw na antas kan gun ownership sa rehiyon, kun sain kinakarkulong nasa 10 milyon na badil an nag-iikot sa nasyon o katumbas nin haros sarong badil sa kada Pitong residente.
Sa ibong kan mga promesang higotan an gun laws, padagos pa man na giraray na nakakapagrehistro an nasyon nin mga insidente nin pambabadil.
