Pinaluwas na kan organizer kan Maroon 5 concerts an presyo kan ticket para sa saindang concert sa nasyon sa Enero sa masunod na taon. Sigun sa Live Nation Philippines, P18,250 an pinakamahal na ticket mantang P3,500 an General Admission.
Anom na tiket sana kada tawo o kada transaksyon an tutugutan. Mapoon sindang magpabakal nin mga tiket sa Setyembre 28. Apwera sa Pilipinas, an grupo magkakaigwa man nin mga konsyerto sa Jakarta, Bangkok, Kuala Lumpur, Tokyo asin Taiwan.
Ini an ikaapat na pagkakataon na magkakaigwa nin konsyerto an banda, an enot iyo an kan 2015, 2019 asin an huring beses kan 2022.
An grupo nabilog kan 1994 asin kabali an mga miyembro: Adam Levine, Jesse Carmichael, James Valentine, PJ Morton, Matt Flynn, Sam Farrar, Mickey Madden, asin Ryan Dusick.
Nagkapira sa mga sikat nindang kanta iyo an “She Will Be Loved”, “Payphone”, “Sunday Morning”, asin kadakol pang iba.
